Christmas 2025

Jezucho ani Mariecho zolm amkam patkantlim soddovunk

Fr. Jorge Pazi Fernandes

Decembrachea mhoineant don mukhel porbo ami somorombhtanv. Ani he donui porbam modem ek ghombir soirigot asa, hacher ami ek davtti nodor marun sozmonni gheunk proitn kortoleanv.

Hea mhoineache 8^ver Maria nixkollonk gorvh sambavlo tem nihalltoleanv. Hem amchem bhavartache sot, Biblacher hache voir amkam kainch mellona punn Povitr sobha hem bhavartache sot mhunn amkam xikoita. Proteak munis mull patkan zolmota ani bautismant amkam bogsonnem gavta. Maria sovem oxem ghodllemna, Ti avoichea kuxveant patka-vinnem gorvh sambavli mhunge Tichea jivitache survatek thaun koslench patok Tika laglem na. Hem Tika ek Devache denem (Privilege of God) Jezu Devacho put tichea kusveant zolmocho aslo dekhun Devan tika hem denem favo kelem. Tuka aplea kusveant samballo ani dudan poslo Ti ostori subagi.

Jezucho zolm: Bodven Tika sanglem Povitr Atmeache kurpen Tum gorbest zatoli, soimbha pormonnem dadlea- bailechea ekvotan ami avoichea kuxvent gorvh sambavtanv, Jezu Maria ani Juzechea ekvottache foll noi punn Povitr Atmeache kurpen Jezu Mariechea kusveant gorvh sambavta hi Devachi yevzonn.  Jezu Devacho put patka vinnem zolmunk karonn To patkacher Zoit vortolo aslo. Bhag. Paulu mhonta patok mat soddun to munxeache gotin zolmolo ani jielo. Jezu khoro monis ani monxeacheo sogleo odchodnneo taka asleo punn kednanch patok kelem-na. Soitanacheo tallnneo Taka aileo punn To zoitivont zalo. Jezucho zolm nitoll ani nirmoll. To goriba modem gorib koso zolmolo ani jielo.

Mariecho tosoch Jezucho zolm odchoriancho karon dogai soimbache patok lagu zaina-astonnam zolmank ailim. Devan oxem kiteak kelem ? karonn tuka ani mhaka patkachi suttka diunk. Tancho zolm paskanche porbhek lagu zata ani Jezuchea jivontponant amchi khori patkanchi suttka zali.

Paskanche rati paskanchi porgotnim zata thuim aslolem thoddim utram ghevun ami niall korum-ia.

Paskanchi porgotnim : 1. Amkam Jezun soddounk nasli zalear Jezu zolmun amkam koslo faido.

2. Amche boldek Jezun sasnachea Bapak Adanvache rinn farik kelem ani purvilem patok mogan vikrailolea Aplea rogtan duvun kadlem

3. Dubhavavinn gorjechem, Jezuchea mornan natak zalem tem patok tem Adavanchem! Itlo ut’tom, kitlo vorto Soddvonnar favo zalo, kitlo bhagi opradh to.

4. Mornacheo sanklleo toddun uddoun zoitacho bavto gheun Jezu fonddantlo uttlo.

Dekhun Jezucho ani Saibinnecho zolm amkam somestank faideacho, tanchea zolma modem anik Jezuchea punorjivontponnam modem ek kherit sombondh asa.

Tumkam sogleank Padri vigarachea nanvan, Padri kuranchea nanvan ami mujea nanvan natalanchi hunhunit porbi anvdeta.